1970 මුල් භාගයේ සිට සමස්ථ සෞඛ්ය සේවා පද්ධතිය තුල මාතෘ හා ළමා සෞඛ්ය සේවා පිළිබදව විශේෂ අවධානයක් යොමු කෙරිනි. එහි ප්රතිඵලයක් ලෙස කාර්යක්ෂම හා ඵලදායී පවුල් සෞඛ්ය සේවාවක් දීප ව්යාප්තව ලබා දීමට අවශ්ය යටිතල පහසුකම් ශක්තිමත් කෙරනි. සෞඛ්ය යනු විමධ්යගත විෂයයක් වන අතර මධ්යම රජයේ හා පලාත් සෞඛ්ය සේවා බලධාරින්ගේ සම්බන්ධීකරණය යටතේ පවුල් සෞඛ්ය සේවා සපයනු ලබයි.
මාතෘ හා ලමා සෞඛ්ය සහ පවුල් සැලසුම් වැඩසටහන් සැලසුම් කිරීම, සම්බන්ධීකරණය, සුපරීක්ෂාව හා ඇගයීම ඉටුකරන සෞඛ්ය අමාත්යාංශයෙන් ජාතික තලයේ කේන්ද්රස්ථානය පවුල් සෞඛ්ය කාර්යාංශයයි. පලාත් මට්මමේ දී පලාත් සෞඛ්ය සේවා, අධ්යක්ෂ දෙපාර්තමේන්තු ප්රධානියා වන අතර ඔහුගේ සහායට එක් එක් දිස්ත්රික්කය සඳහා ප්රාදේශීය සෞඛ්ය සේවා අධ්යක්ෂවරයකු බැගින් පත් කර ඇත. ප්රාදේශීය සෞඛ්ය සේවා අධ්යක්ෂවරයාගේ සහායට තාක්ෂණික දැනුමින් යුත් නිලධාරීන් සහ සෙසු කාර්ය මණ්ඩලයක් ඇත. තාක්ෂණික දැනුමින් යුත් කණ්ඩායම වන්නේ වෛද්ය නිලධාරී (මාතෘ හා ලමා සෞඛ්ය), ප්රාදේශීය වසංගත රෝග වෛද්ය, ප්රාදේශීය දත්ත වෛද්ය නිලධාරී, ප්රාදේශීය අධීක්ෂණ මහජන සෞඛ්ය පරීක්ෂක, සෞඛ්ය අධ්යාපන නිලධාරින්(1 සිට 3 දුක්වා සංඛ්යාවක්), සංඛ්යා සමීක්ෂණ නිලධාරින්, පරිපාලන සෞඛ්ය හෙද නිළධාරීන් හා වැඩසටහන් සැලසුම් නිලධාරින්ය.
දිස්ත්රික්කය තුල සෞඛ්ය සේවා සපයනු ලබන්නේ වෛද්ය ආයතන ජාලය හා සෞඛය ඒකක (සෞඛ්ය වෛද්ය නිලධාරි කොට්ඨාශ) හරහාය.
සෞඛ්ය වෛද්ය නිලධාරී කොට්ඨාශය යනු කුඩාම මහජන සෞඛ්ය සේවා ඒකකය වන අතර එය සෞඛ්ය වෛද්ය නිලධාරිවරයෙක්ගේ කලමණාකාරිත්වය යටතේ පවතී. එක් දිස්ත්රික්කයක් තුල එවැනි ඒකක 7 ත් 20ත් අතර ප්රමාණයක් ඇත. සෞඛ්ය වෛද්ය නිලධාරිගේ සහයට මහජන සෞඛ්ය හෙද සොයුරිය, මහජන සෞඛ්ය පරීක්ෂකවරුන්, පරිපාලන පවුල් සෞඛ්ය සේවා නිලධාරිනිය හා පවුල් සෞඛ්ය සේවා නිලධාරිනියන්ගෙන් සමන්විත කණ්ඩායමක් ඇත. ප්රජාවේ මව්වරුන්ට ගෘහස්ථ සේවා සපයනු ලබන ඉදිරි පෙල සෞඛ්ය වෘතිකයා වන්නේ පවුල් සෞඛ්ය සේවා නිලධාරිනියයි. එක් එක් පවුල් සෞඛ්ය සේවා නිලධාරිනියට ජනගහනය 2000 සිට 7000 දක්වා ප්රමාණයකින් සමන්විත නිශ්චිතව වෙන් කල කොට්ඨාශ ලබා දී ඇති අතර ක්රමවත් ගෘහ පිවිසීම් තුලින් ප්රජාවේ මවුවරුන්ට හා දුරුවන්ට නිවසේ දී සංරක්ෂණය ලබා දීම සිදු කරයි. එමෙන්ම සෞඛ්ය අධ්යාපනය, සෞඛ්ය වැඩසටහන් පිළිබඳ දැනුවත් කිරීම්, අදාල සේවා ලාභීන්ට පවුල් සැලසුම් උපදේශනය ලබා දීම ඇය විසින් ඉටුකරයි. තම ප්රදේශය තුල පවුල් සැලසුම් උපකරණ (ගිලින පෙති සහ උපත් පාලන කොපු) සේවා ලාභීන්ට බෙදා දීම හා පසු විපරම් කටයුතු සිදු කිරීම ද ඇය විසින් ඉටු කල යුතුය. තව ද අවුරුදු 35 ට වැඩි කාන්තාවන් සුවනාරි සායනයට සහභාගි වීමට දිරිමත් කිරීම හා එක් එක් සේවාලාභියා ලබා දුන් උපදෙස් නිසිපරිදි පිලිපදින්නේ දැයි ක්ෂේත්ර පසු විපරම් කටයුතු වලින් සොයා බැලීමද ඇය විසින් සිදු කරනු ලබයි. ගෘහස්ථ සේවාවන්ට අමතර ව ඇය ප්රදේශයේ සායනවලට සහභාගිවෙමින් ප්රජාව සහ සෞඛ්ය සේවා පද්ධතිය තුල මනා සබඳතාවක් ගොඩනගන්නීය. මනාව වර්ධනය වී ඇති මෙම පද්ධතිය හරහා ප්රතිඵලදායි ලෙස නිවාරන සේවා කටයුතු ලබා දීම සහ මාතෘ හා ළමා සෞඛ්ය ප්රවර්ධනය සිදු කරන අතර සංවර්ධනය වෙමින් පවතින රටවල් සඳහා මෙය ආදර්ශ මහජන සෞඛ්ය පද්ධතියක් (මොඩලයක්) ලෙස සුදුසු යැයි කතිකාවක් ද පවතී.
මාතෘ හා ළමා සෞඛ්ය වැඩ සටහන් සැලසුම් කිරීම දියත් කිරීම, සුපරික්ෂාව හා අගැයීම සම්බන්ධයෙන් ප්රතිපත්ති සම්පාදනයට අවශ්ය කාලීන තොරතුරු හා සාක්ෂි නිරන්තරයෙන් ලබා දීම.
